Bakı şəhəri

# 12

21 may 2010-cu il

“Auditor xidməti haqqında” Azərbaycan Respublikası Qanununun
11-ci maddəsinin “Auditorun başqa növ fəaliyyətlə məşğul olması
qadağandır” müddəasının tələblərinə riayət olunması ilə bağlı
qabaqlayıcı tədbirlərin görülməsi barədə

“Auditor xidməti haqqında” Azərbaycan Respublikası Qanununun 11-ci maddəsinin “Auditorun başqa növ fəaliyyətlə məşğul olması qadağandır” müddəasının tələblərinin Auditorlar Palatasının bəzi əməkdaşları tərəfindən pozulması faktlarının yol verilməzliyi və bu sahədə qabaqlayıcı tədbirlərin görülməsi zərurəti barədə Korrupsiyaya qarşı mübarizə və daxili audit şöbəsinin müdiri M.Abbasovun məlumatını nəzərə alaraq

ƏMR EDİRƏM:

1. “Auditor xidməti haqqında” Azərbaycan Respublikası Qanununun 11-ci maddəsinin “Auditorun başqa növ fəaliyyətlə məşğul olması qadağan-dır” müddəasının tələblərinin Auditorlar Palatasının bəzi əməkdaşları tərə-findən pozulması ilə bağlı daxil olan məlumatları və bununla bağlı Palata üzvlərinin haqlı narazılıqlarının yaranması faktları barədə Korrupsiyaya qarşı mübarizə və daxili audit şöbəsinin müdiri M.Abbasovun məlumatı nəzərə alınsın.
2. Palatanın bəzi əməkdaşları tərəfindən Qanunun “Auditorun başqa növ fəaliyyətlə məşğul olması qadağandır” müddəasının tələblərinin pozulması hallarına yol verilməsi Auditorlar Palatasının qanunvericiliklə müəyyən olunmuş audtor xidmətinin tənzimlənməsi funksiyası ilə bir araya sığmayan və korrupsiya hüquqpozmalarına və haqsız rəqabətə şərait yaradan hal kimi qiymətləndirilsin.
3. Palatanın əməkdaşlarına Qanunun bu tələbinin pozulması faktları aşkar edildiyi təqdirdə barələrində ciddi intizam tədbirləri görüləcəyi və tutduqları vəzifədən azad ediləcəkləri barədə xəbərdarlıq edilsin.
4. Auditin təşkili və tənzimlənməsi şöbəsinə (M.Hacıyev) tapşırılsın ki, auditor xidməti ilə məşğul olmaq hüququ verən lisenziyanı əldə etmiş Palata əməkdaşlarının lisenziyalarının Palatada saxlanılması vəziyyəti barədə müvafiq arayışı 3 (üç) gün müddətində rəhbərliyə təqdim etsin.
5. Şəffaflığın artırılması və korrupsiyaya qarşı mübarizə üzrə Milli Strategiyanın başlıca tələblərindən biri olan aşkarlığın təmin olunması məqsədilə Palatanın müvafiq struktur bölmələrinə (V.Rəhimov, Ş.Yaqubov) tapşırılsın ki, əmrin mətni Palatanın internet saytında yerləşdirilsin və “İqtisadiyyat və audit” jurnalının növbəti nömrəsində bu barədə məlumat dərc edilsin.
6. Bu əmrin icrasına nəzarət Korrupsiyaya qarşı mübarizə və daxili audit şöbəsinin müdiri M.Abbasova həvalə edilsin.

PALATANIN SƏDRİ V.NOVRUZOV