Qeyd edək ki, Regional Layihə GRBS® və Azərbaycan Respublikası Auditorlar Palatasının təşəbbüsü ilə və yerli icra hakimiyyəti orqanları cəlb edilməklə 2010-cu ilin mart ayında başlamışdı. Layihənin məqsədi Azərbaycan Respublikası zati-aliləri cənab İlham Əliyev tərəfindən imzalanmış və artıq 1 ildən çoxdur ki, uğurla həyata keçirilən “Azərbaycan Respublikası regionlarının 2009-2013-cü illərdə sosial-iqtisadi inkişafı üzrə Dövlət Proqramı”na uyğun olaraq şəffaflıq və müəssisələrin fəaliyyətində beynəlxalq standartların tətbiqi, həmçinin Beynəlxalq Maliyyə Hesabatı Standartlarının tədrisi istiqamətində praktik seminar müşavirə keçirməklə doğma yurdumuzun paytaxtı Bakıdan kənarda qalmış regionlarının inkişafında iştirak etmək və regionlarda çalışan mütəxəssislərimizin bilik və təcrübələrinin artırılmasında əhəmiyyətli dərəcədə rol oynamaqdır.

Xüsusi ilə vurğulanmalıdır ki, layihə Azərbaycanın bütün regionlarını əhatə etmişdir. Belə ki, seminar-müşavirələr bir-birinin ardınca Xaçmaz, Naxçıvan Muxtar Respublikası, Lənkəran, Zaqatala və Gəncə şəhərlərində keçirilmişdir. Tamamilə ödənişsiz əsasda keçirilən seminarlarda ümumilikdə 1000 (min) nəfərdən artıq Azərbaycan mühasib və auditorları, həmçinin müxtəlif istiqamətlərdə fəaliyyət göstərən müəssisə rəhbərləri iştirak ediblər. Uğurla keçirilən praktiki seminarların sonunda iştirakçılar təntənəli şəkildə GRBS® və Azərbaycan Respublikası Auditorlar Palatası tərəfindən şəhadətnamələrlə təltif olunublar.

Keçirilən bütün tədbirlərdə təşəbbüskarlar – GRBS® və Azərbaycan Respublikası Auditorlar Palatası ilk növbədə Regional Layihənin uğurla həyata keçirilməsində göstərilən köməkliyə görə xüsusi ilə respublika rəhbərliyinə, Gəncə şəhəri, Xaçmaz, Lənkəran və Zaqatala rayonlarının İcra Hakimiyyəti başçılarına, həmçinin Naxçıvan Muxtar Respublikasının Maliyyə Nazirliyinə dərin minnətdarlığını bildirmişdir.



Proqrama uyğun olaraq bütün regionlarda seminar-müşavirələr müasir Azərbaycanın banisi, zati-aliləri cənab Heydər Əliyevin abidəsini ziyarət ilə başlanılmışdır. Seminarlarda giriş sözü ilə çıxış edən rayon və şəhər rəhbərlikləri “Regionların sosial-iqtisadi inkişafı dövlət proqramı“na toxunaraq, regionların timsalında bu proqramın uğurlarından danışıblar. Ölkə Prezidenti İlham Əliyevin yeritdiyi sosial-iqtisadi siyasətin ölkəni gündən-günə inkişaf etdirərək xalqın rifahını yaxşılaşdırdığını bildiriblər. Natiqlər Prezident İlham Əliyevin 2004-cü ildə imzaladığı proqramın qısa bir zaman ərzində öz bəhrəsini verdiyini qeyd edərək, regionların son illər daha da sürətlə inkişafının göz qabağında olduğunu vurğulayıblar.

Seminar müşavirlərdə Azərbaycan Respublikası Auditorlar Palatasının sədri Vahid Novruzov “Sosial-iqtisadi inkişafın Azərbaycan modelində şəffaflıq amili” mövzusunda seminar iştirakçıları qarşısında çıxış edib. Palata sədri, Azərbaycanın hər tərəfli inkişafının mühasibatlıq və audit sahəsində də uğurlara gətirib çıxardığını bildirib. Vahid Novruzov Auditorlar Palatasının Azərbaycanda daxili auditin hüquqi bazasını yaratmağa nail olunduğunu nəzərə çatdırıb. Cənab Novruzov, həmçinin GRBS®-in Azərbaycanda peşəkar mühasib və auditorların hazırlanmasındakı əvəzsiz rolunu vurğulayıb. Respublikanın baş auditoru digər ölkələrin artıq Azərbaycanın audit sahəsindəki təcrübəsindən yararlanmaq istədiklərini bildirib.

Seminarlarda çıxış edən GRBS®-in İdarəedici Direktoru Bəhram Qurbanov bildirib ki, Azərbaycanın səfalı guşələrində olmaq və respublikamızın sürətli inkişafını görmək onu sevindirir. GRBS® rəhbəri yerli mühasiblərə və auditorlara keçirilən təlimlərin mühüm əhəmiyyətini nəzərə çatdırmaqla yanaşı, yaxın gələcəkdə regionlarda İcra Hakimiyyətlərinin dəstəyi ilə uzunmüddətli kursların təşkil edilməsi istəyinin olduğunu da vurğulayıb. Cənab Qurbanov regionlarda bu qəbildən olan tədbirləri həyata keçirməklə GRBS®-in hər zaman cənab Prezident İlham Əliyevin apardığı sosial-iqtisadi siyasətin uğurlu nəticələrinin sırasına öz töhfəsini verməyə çalışdığını qeyd edib.

Tədbirlər daha sonra Auditorlar Palatası sədrinin elmi-metodik məsələlər üzrə müşaviri Nəcəf Talıbov “Maliyyə hesabatlarında şəffaflığın təmin edilməsində Beynəlxalq Standartların rolu” mövzusunda seminar iştirakçıları qarşısında çıxışı ilə davam edib və natiq tədbir iştirakçılarının maraqlandıran sualları cavablandırıb.

Seminarların praktiki hissəsi isə GRBS® Tədris Mərkəzinin Beynəlxalq və Milli Mühasibat Uçotu Standartları üzrə ekspert-məsləhətçisi Elşən Rəhimov tərəfindən keçirilib. Cənab Rəhimov iştirakçılara Beynəlxalq və Milli Mühasibat Uçotu Standartları üzrə təlim keçib. Beynəlxalq təcrübəli ekspert, maliyyə hesabatlarının konseptual əsasları, gəlirin tanınması, uzunmüddətli maddi aktivlər uçotu, dərc edilmiş maliyyə hesabatlarının təqdimatı, vergi uçotu və digər mövzulara toxunub. Qarşılıqlı dialoq şəklində keçən təlimlər iştirakçılar tərəfindən böyük maraq və məmnuniyyətlə qarşılanıb.

Sonda bir daha xatırladaq ki, GRBS® və Azərbaycan Respublikası Auditorlar Palatasının təşəbbüsü ilə keçirilən bu Regional Layihə bir neçə mərhələdən ibarətdir və seminar müşavirələr layihənin ilkin mərhələsidir və regionallarda ilkin informasiyanın verilməsi məqsədini daşıyır. Yaxın gələcəkdə regionlarda İcra Hakimiyyətlərinin dəstəyi ilə uzunmüddətli kursların təşkil edilməsi planlaşdırılır.