"AZƏRBAYCAN RESPUBLİKASININ AUDİTORLAR PALATASI"

AZƏRBAYCANIN DAXİLİ AUDİT TƏCRÜBƏSİ AVROPADA TƏQDİR OLUNUR

Azərbaycan Respublikası Auditorlar Palatasının sədri, IIA-nın "Audit- Azərbaycan" bölməsinin � Azərbaycan Daxili Auditorlar İnstitutunun prezidenti, professor Vahid Novruzov başda olmaqla, respublikamızın daxili auditorlarının nümayəndə heyəti 2008-ci ilin 18-23 noyabr tarixlərində Avropa Daxili Audit İnstitutları Konfederasiyasının Berlin şəhərində keçirilmiş illik konfransında və Almaniya Federativ Respublikası Daxili Auditorlar İnstitutunun 50 illik yubileyi tədbirlərində iştirak etmişdir.

Azərbaycan auditorlarının 2004-cü ildən üzv olduğu və 40-dan çox ölkənin 461 təmsilçilərinin iştirak etdiyi Avropa Konfederasiyasının illik konfransında Avropada daxili audit peşəsi, korporativ idarəetməyə hazırlıq, korporativ strategiya və daxili auditin əlaqəsi, Şərqi Avropada planlı təsərrüfatdan bazar iqtisadiyyatına keçid dövründə daxili auditin inkişafı, Şərqi və Qərbi Avropada daxili auditin təşkili və strukturu, orta ölçülü şirkətlər və daxili audit, qlobal daxili audit peşəsi, sığorta sahəsində daxili auditin inkişafı, kiçik müəssisələrdə daxili audit problemləri və s. mövzular üzrə məruzələr dinlənilmiş, peşəkar müzakirələr və təcrübə mübadiləsi aparılmışdır.
Konfransın proqramına uyğun olaraq, professor Vahid Novruzov "Azərbaycanda daxili audit qanunvericiliyi" mövzusunda məruzə etmişdir. Azərbaycanın Almaniya Federativ Respublikasındakı fövqəladə və səlahiyyətli səfiri Pərviz Şahbazovun yaxından dəstəyi ilə xarici ölkə nümayəndələrinin diqqətinə əyani şəkildə çatdırılan və iştirakçılar tərəfindən diqqətlə qarşılanan məruzədə son illərdə ölkəmizdə həyata keçirilən uğurlu iqtisadi islahatların nəticələri, nəzarət sisteminin təkmilləşdirilməsi, xüsusən də şəffaflığın artırılması və korrupsiyaya qarşı mübarizə istiqamətində möhtərəm Prezidentimiz cənab İlham Əliyevin rəhbərliyi ilə həyata keçirilən sistemli tədbirlər barədə ətraflı bəhs olunmuşdur.

Səfər müddətində nümayəndələrimiz bir sıra ölkələrin, o cümlədən ABŞ, Almaniya, Türkiyə, İndoneziya, Fransa, İtaliya və Rusiyanın təmsilçiləri ilə işgüzar görüşlər keçirmiş, Azərbaycan Respublikasında dövlət quruculuğu və iqtisadi islahatların aparılması, şəffaflığın artırılması və korrupsiyaya qarşı mübarizədə maliyyə nəzarətinin rolu, auditin inkişafı istiqamətində əldə edilən nailiyyətlər barədə onlara geniş məlumatlar vermişlər. Ölkəmizdə "Daxili audit haqqında" Qanunun qəbul edilməsi və tətbiqi barədə məlumatlar xarici ölkələrdən olan həmkarlarda xüsusilə böyük maraq doğurmuşdur.

Nümayəndələrimiz Almaniya Federativ Respublikası Daxili Auditorlar İnstitutunun 50 illik yubileyi tədbirlərində də iştirak etmiş və xatirə hədiyyəsi təqdim etmişlər.

Almaniya Daxili Auditorlar İnstitutunun prezidenti Bernard Şartman Azərbaycanın daxili audit qanunvericiliyi sahəsində bütün Avropa ölkələrini qabaqladığını xüsusi qeyd etmişdir.

Yeri gəlmişkən, Azərbaycanda həyata keçirilən islahatları yüksək qiymətləndirən Almaniya daxili auditorları azərbaycanlı həmkarları ilə əməkdaşlığa xüsusi maraq göstərmiş və ikitərəfli əməkdaşlıq sazişinin imzalanması təklifi ilə müraciət etmişlər. Azərbaycan və Almaniya daxili auditorları arasında əməkdaşlıq sazişinin imzalanmasının 2009-cu ilin may-iyun aylarında Bakıda reallaşması barədə ilkin razılaşma əldə edilmişdir.

Konfrans zamanı audit sahəsində çoxlu sayda normativ hüquqi sənədlər və digər materiallar əldə edilərək, tətbiq olunmaq üçün respublikamıza gətirilmişdir.