I. Ümumi müddəalar

1.1. Azərbaycan Respublikasında auditor xidmətinin keyfiyyətinə nəzarət üzrə Əsasnamə (bundan sonra «Əsasnamə» adlandırılacaq) auditor xidmətinin keyfiyyətinə nəzarət həyata keçirilərkən icrası zəruri olan prosedurları müəyyən edir.
1.2. Əsasnamənin məqsədi auditor xidmətinin keyfiyyətinin Azərbaycan Respublikasının qanunvericilik aktlarına, audit standartlarının və peşə etikası məcəlləsinin tələblərinə, habelə Azərbaycan Respublikasının Auditorlar Palatası Şurasının (bundan sonra «Palata Şurası» adlandırılacaq) qərarları ilə müəyyən edilmiş qaydalara uyğunluğunu təmin etməkdir.

II. Keyfiyyətə nəzarət prosedurları

2.1. Keyfiyyətə nəzarət Palata Şurası tərəfindən təyin olunan Azərbaycan Respublikası Auditorlar Palatasının (bundan sonra «Auditorlar Palatası» adlandırılacaq) üzvü olan Keyfiyyətə nəzarət üzrə müfəttişlər (bundan sonra «müfəttişlər» adlandırılacaq) tərəfindən həyata keçirilir. Palata Şurası 10-dan çox və 5-dən az olmamaq şərtilə müfəttişləri təyin edir.
2.2. Auditor təşkilatlarının və sərbəst auditorların (bundan sonra «auditor» adlandırılacaq) göstərdikləri auditor xidmətinin keyfiyyətinə nəzarət üzrə yoxlamalar azı 2 müfəttişdən ibarət nəzarət qrupu tərəfindən həyata keçirilir. Hər bir konkret yoxlama üzrə nəzarət qrupunun say tərkibi fəaliyyəti yoxlanılacaq auditorun və xidmət göstərilmiş sifarişçilərin sayı nəzərə alınmaqla müəyyən edilir.
2.3. Hər bir auditorun fəaliyyəti ən azı 3 (üç) ildən bir yoxlanılır.
2.4. Keyfiyyətə nəzarət planlaşdırılmış və plandankənar yoxlamalar şəklində həyata keçirilir.
2.5. Planlaşdırılmış yoxlamalar cari ilin iyun ayının 1-dən sonrakı dövr ərzində, plandankənar yoxlamalar isə bütün təqvim ili ərzində keçirilir.
2.6. Planlaşdırılmış yoxlamalar Palata Şurası tərəfindən təsdiq edilən illik plan üzrə keçirilir.
2.7. İllik plan təsdiq olunduqdan sonra Palata Şurası 1 ay ərzində cari il üçün planlaşdırılmış yoxlamaları, nəzarət qruplarının rəhbərlərini və üzvlərini təyin edir. Yoxlamaların planı Auditorlar Palatasının üzvləri üçün açıq və anlaşıqlı olur.
2.8. Plandankənar yoxlamalar Auditorlar Palatasının müvafiq komitələrinin tələbi ilə aşağıdakı hallarda keçirilir:
- planlaşdırılmış yoxlama zamanı əhəmiyyətli nöqsan və çatışmazlıqlar aşkar olunaraq, auditor xidmətinin keyfiyyəti bu Əsasnamənin 5.5-ci bəndində göstərildiyi qaydada, «B» və ya «C» k
imi qiymətləndirilmişsə;
- auditi aparılmış təsərrüfat subyektləri və ya üçüncü şəxslər tərəfindən daxil olmuş müraciətlərə Auditorlar Palatasının müvafiq komitələrində baxıldıqdan sonra auditor xidməti göstərilərkən audit standartlarının və ya peşə etikası məcəlləsinin kobud şəkildə pozulması aşkar edilərsə;
- müəyyən növ auditin müqavilə öhdəliyindən və ya qanunvericiliyin tələblərindən irəli gələn şərtlər daxilində icra edilməsinin qiymətləndirilməsi məqsədəuyğun hesab edildikdə.
2.9. Keyfiyyətə nəzarət üzrə yoxlamalar, həmçinin, aşağıdakı halları da əhatə edir:
- mövcud qanunvericiliyə və audit standartlarının tələblərinə müvafiq olaraq, auditlə əlaqəli xidmətlərin auditor tərəfindən təmin edilib-edilməməsinin yoxlanılmasını;
- təsərrüfat subyektinin xüsusiyyətləri nəzərə alınmaqla, auditor tərəfindən daxili audit prosedurlarının effektiv qaydada yerinə yetirilib-yetirilməməsinin yoxlanılmasını;
- peşə etikası məcəlləsinin tələblərinə və xüsusilə, auditorun müstəqilliyi normasına əməl edilib-edilməməsinin yoxlanılmasını.
2.10. Hər bir yoxlama iki mərhələdən ibarət olur:
- keyfiyyətə daxili nəzarət sisteminin qiymətləndirilməsi;
- hər bir müqavilə öhdəliyi üzrə ayrı-ayrılıqda audit işinin qiymətləndirilməsi.
2.11. Yoxlama, bir qayda olaraq, 3-5 gün müddətinə planlaşdırılır. Zərurət olduqda, Auditorlar Palatasının Keyfiyyətə nəzarət komitəsi (bundan sonra «Keyfiyyətə nəzarət komitəsi» adlandırılacaq) yoxlamanın müddətini daha 5 gün müddətinə uzada bilər.
2.12. Keyfiyyətə nəzarət üzrə qrupun müfəttişi aşağıdakı meyarlara uyğun olmalıdır:
- \\ən azı 3 il auditor təcrübəsinə malik olmaq;
- son 2 il ərzində heç bir nizam-intizam tənbehi almamaq;
- keyfiyyətə nəzarət üzrə ixtisasartırma kurslarında iştirak etmək;
- Palata Şurasının, habelə Auditorlar Palatasının müvafiq komitələrinin üzvü olmamaq.
2.13. Müfəttiş aşağıdakı hallarda yoxlamada iştirak edə bilməz:
- yoxlanılan auditorun işçisi olduqda və ya son 3 il ərzində orada işlədikdə;
- fəaliyyəti yoxlanılan auditorun audit işində son 3 il ərzində iştirak etmiş olduqda;
- mövcud qanunvericiliyə əsasən, auditor fəaliyyəti ilə məşğul olmaq hüququ verən auditor lisenziyası ləğv edildikdə və ya lisenziyanın fəaliyyəti müvəqqəti olaraq dayandırıldıqda.
2.14. Nəzarət qrupunun rəhbəri yoxlamanın konkret vaxtını təyin edir və yoxlamaya ən azı 1 (bir) ay qalmış bu barədə fəaliyyəti yoxlanılan auditoru yazılı şəkildə məlumatlandırır.
2.15. Fəaliyyəti yoxlanılacaq auditor yoxlamaya 15 gün qalanadək nəzarət qrupunun tərkibi barədə irad və təkliflərini yazılı şəkildə bildirmək hüququna malikdir. Palata Şurası iradların əsaslı olub-olmamasına baxaraq, zəruri hallarda nəzarət qrupunun tərkibində dəyişiklik etmək barədə qərar qəbul edir.
2.16. Fəaliyyəti yoxlanılacaq auditor yoxlamaya 1 (bir) həftə qalmış nəzarət qrupunun rəhbərini son 2 il ərzində yerinə yetirilmiş müqavilələrin siyahısı ilə təmin edir.
Siyahı aşağıdakı məlumatları əhatə edir: auditorun adı, auditor xidmətinin növləri, fəaliyyət növü, dövriyyəsi, aktivlərinin ümumi məbləği, işçilərinin sayı, müqavilə ilə əlaqədar cəlb olunmuş əməkdaşlar, auditor xidmətinin göstərilməsinə sərf olunan saatların miqdarı, auditor müqaviləsinin ilkin öhdəlik olub-olmaması barədə qeyd./
2.17. Fəaliyyəti yoxlanılan auditor nəzarət qrupunu yoxlama ilə əlaqədar tələb olunan bütün məlumatlarla təmin etməyə borcludur.
2.18. Fəaliyyəti yoxlanılan auditorun yoxlama prosesində iştirakı zəruridir.
2.19. Yoxlama nəzarət qrupunun rəhbəri tərəfindən təyin edilən iclasla yekunlaşdırılır. İclasın vaxtı fəaliyyəti yoxlanılmış auditorla razılaşdırılır.
2.20. Nəzarət qrupunun rəhbəri yoxlamanın yekunlarına dair hesabatın layihəsini təyin olunmuş iclasa qədər fəaliyyəti yoxlanılmış auditora təqdim edir. Auditor hesabatın layihəsi barədə irad və təkliflərini bildirmək hüququna malikdir.
2.21. Nəzarət qrupu yoxlamanın nəticəsi üzrə hesabatı Keyfiyyətə nəzarət komitəsinə təqdim edir. Komitə hesabatı qiymətləndirir və nəticədən asılı olaraq:
- arxivdə saxlanılmaq barədə qərar qəbul edir;
- plandankə\\nar yoxlamanın məqsədəuyğunluğu barədə təkliflər verir;
- intizam tənbehinin tətbiq edilməsi barədə qərar qəbul etmək üçün Auditorlar Palatasının Etika Komitəsinin müzakirəsinə təqdim edir.
2.22. Palata Şurası keyfiyyətə nəzarət üzrə yoxlamanın yekunları barədə hesabatın formasını və məzmununu təsdiq edir.
2.23. Cari ilin sonuna qədər Keyfiyyətə nəzarət komitəsi bütün yoxlamaların nəticələrini toplayır və növbəti ilin yanvar ayında Palata Şurasına təqdim edir. Statistik məlumatlar daxil olmaqla, illik hesabat auditor tərəfindən yoxlanılan təsərrüfat subyektinin adı göstərilmədən Auditorlar Palatasının internet saytında yerləşdirilir. Hesabat aşağıdakı məlumatları özündə birləşdirir:
- planlaşdırılmış və plandankənar yoxlamaların sayı;
- yoxlamaların nəticələri;
- yoxlamalar zamanı aşkar olunmuş nöqsan və çatışmazlıqlar;
- auditor xidmətinin keyfiyyətini yaxşılaşdırmaq üçün verilən məsləhət və tövsiyələr;
- plandankənar yoxlamalar zamanı aşkar olunan faktlar;
- yoxlamaların nəticələrinə əsasən tətbiq edilmiş intizam tənbehi haqqında məlumat.
2.24. Auditorlar Palatasının komitələri, müfəttişlər, həmçinin, Auditorlar Palatasının üzvləri və əməkdaşları keyfiyyətə nəzarət üzrə yoxlamalar zamanı əldə olunmuş məlumatdan yalnız xidməti vəzifələrin icrası üçün istifadə edir və məlumatın 3-cü şəxsə bildirilməsi üçün məsuliyyət daşıyırlar. Bu şərt qanuna müvafiq olaraq səlahiyyətli dövlət orqanlarına çatdırılacaq məlumatlara və bu Əsasnamənin 2.23-cü bəndinə müvafiq olaraq ictimai əhəmiyyətli hesab olunan məlumatlara aid edilmir.


III. Keyfiyyətə daxili nəzarət sisteminin qiymətləndirilməsi qaydası

3.1. Keyfiyyətə daxili nəzarət sisteminin qiymətləndirilməsi  keçirilən yoxlamanın ayrılmaz tərkib hissəsidir. Qiymətləndirmənin məqsədi «Auditor xidməti haqqında» Azərbaycan Respublikası Qanununun tələblərinə və audit standartlarına aşağıdakı sahələrdə nə dərəcədə riayət olunduğunu müəyyənləşdirməkdir:
- lisenziyalı auditorların, onların köməkçilərinin və digər mütəxəssislərin üzərinə yüksək peşəkar tələblərin qoyulması;
- lisenziyalı auditorların, onların köməkçilərinin və digər mütəxəssislərin bilik və bacarıqlarının peşəkar inkişafının təmin olunması;
- müqavilə öhdəliyinin düzgün müəyyən olunması və daxili nəzarətin effektiv idarə edilməsi;
- yeni sifarişçilərin cəlb olunması və auditor xidməti ilə təmin olunması sahəsində riskin effektiv idarə olunması.
3.2. Keyfiyyətə daxili nəzarət sisteminin səviyyəsi fəaliyyəti yoxlanılan auditor və onun tabeliyində olan işçilər arasında sorğunun keçirilməsi, eləcə də müvafiq sənədləşdirmənin yoxlanılması vasitəsilə qiymətləndirilir.

IV. Müqavilə öhdəliyi üzrə ayrı-ayrılıqda hər bir audit işinin seçilməsi

4.1. Nəzarət qrupunun rəhbəri yoxlanılacaq audit müqavilələri üzrə öhdəlikləri müəyyən edir. Fəaliyyəti yoxlanılacaq auditor tərəfindən ayrı-ayrılıqda hər bir audit işinin yoxlama üçün seçilməsi zamanı qrupun rəhbəri aşağıdakıları nəzərə alır:
- fəaliyyəti yoxlanılan auditor tərəfindən tələb olunan məlumatların vaxtında və tam həcmdə təqdim olunmasını;
- müqavilə öhdəliyi üzrə audit işlərinin ən əhəmiyyətliləri və bu işlərlə bağlı risklər barədə fəaliyyəti yoxlanılan auditor ilə müzakirələrin aparılmasını.
4.2. Müqavilə öhdəliyi üzrə yoxlanılması nəzərdə tutulan ayrı-ayrılıqda hər bir audit işini seçərkən nəzarət qrupunun rəhbəri aşağıdakı prinsipləri əsas götürür:
a) yoxlama üçün seçilmiş ayrı-ayrılıqda hər bir konkret audit işinə dair auditorun və onun köməkçilərinin tərtib etdikləri iş sənədləri peşəkar fəaliyyət barədə tam və əhatəli məlumat əldə etmək üçün yetərli olmalıdır;
b) auditor xidmətinin göstərilməsində iki və ya daha artıq lisenziyalı auditor iştirak edərsə, onda yoxlama hər bir lisenziyalı auditor tərəfindən həyata keçirilən audit işini yoxlamaqla məhdudlaşır, bu şərtlə ki, müqavilə öhdəliyi üzrə ayrı-ayrılıqda hər bir audit işi auditor yoxlamasının ümumi mənzərəsini yetərli qədər əhatə etmiş olsun;
c) yoxlamanın məqsədi keyfiyyətə nəzarət riskinin idarə olunmasını qiymətləndirməkdən ibarət olduğu üçün seçilmiş hər bir audit müqaviləsi öhdəliklərinə xüsusilə yüksək riskdən və ya nisbətən yüksək olan riskdən yaranan müqavilə öhdəlikləri üzrə audit işləri daxil edilir.
4.3. Müqavilə öhdəliyi üzrə yoxlanılması nəzərdə tutulan ayrı-ayrılıqda hər bir audit işi seçilərkən nəzarət qrupunun rəhbəri aşağıdakılara diqqət yetirir:
- fond birjasında qeydiyyata alınmış təşkilatlarda həyata keçirilmiş audit müqavilə öhdəlikləri;
- iri həcmli və kompleks müəssisələrdə həyata keçirilmiş audit müqavilə öhdəlikləri;
- ilkin audit müqavilə öhdəlikləri;
- ixtisaslaşmış və kompleks fəaliyyət sahələrində həyata keçirilmiş audit müqavilə öhdəlikləri;
- məcburi auditdən keçməli olan fəaliyyət sahələrinə xas olmayan audit müqavilə öhdəlikləri.
4.4. Əlaqəli auditor xidmətlərinin göstərilməsi (nizamnamə kapitalının (səhmlərin) qiymətləndirilməsi, razılaşdırılmış prosedurların yerinə yetirilməsi, müəssisələrin yenidən təşkilinin və ya birləşməsinin qiymətləndirilməsi və digər bu kimi müqavilə öhdəliklərinin yoxlanılması) daxili nəzarət üçün seçilir və «yüksək riskli öhdəliklər» kimi xarakterizə edilir.
4.5. Nəzarət qrupunun rəhbəri yoxlamanın başlanmasına 1 (bir) həftə qalmış müqavilə öhdəliyi üzrə seçilmiş audit işləri barədə fəaliyyəti yoxlanılan auditora məlumat verir. Yoxlamanın əvvəlində isə yoxlanılacaq digər audit müqavilə öhdəlikləri barədə fəaliyyəti yoxlanılan auditora məlumat verilir.

     
V. Müqavilə öhdəliyi üzrə ayrı-ayrılıqda hər bir audit işinin keyfiyyətinə nəzarətin qiymətləndirilməsi
5.1. Müqavilə öhdəliyi üzrə ayrı-ayrılıqda hər bir audit işinin keyfiyyətinə nəzarətin qiymətləndirilməsi audit qrupunun rəhbəri və bu öhdəliklərin yerinə yetirilməsinə cəlb olunan əməkdaşların peşəkar fəaliyyəti zamanı əhəmiyyətli risklərin audit standartlarına uyğun olaraq nə dərəcədə düzgün müəyyən edilməsini nəzərdə tutur.
5.2. Bu Əsasnamənin 4.2-ci bəndində nəzərdə tutulan risklər çərçivəsində nəzarət qrupu aşağıdakı məsələlərə riayət olunub-olunmamasını qiymətləndirir:
- müqavilə öhdəliklərindən yaranan risklərin aşkar edilib qiymətləndirilməsi və müvafiq audit prosedurunun seçilməsinin planlaşdırılması;
- testlər, yoxlama prosedurları və müzakirələr vasitəsilə əlaqəli məsələlərin və maliyyə hesabatlarının auditinə  dair auditor rəyinin təqdim edilməsi üçün əhəmiyyətli audit sübutlarının toplanması;
- müqavilə öhdəliklərinin yerinə yetirilməsinə cəlb olunmuş mütəxəssislər tərəfindən görülmüş işlərə bu müqavilə öhdəliklərinin yerinə yetirilməsinə cavabdeh olan audit qrupunun rəhbəri tərəfindən müntəzəm nəzarət olunması;
- maliyyə hesabatları və digər yekun sənədlərinin qüvvədə olan standartlar, normalar və qaydalardan irəli gələn tələblərə müvafiq tərtib edilməsi;
- auditor rəylərinin Azərbaycan Respublikasının qanunvericiliyinə və audit standartlarından irəli gələn tələblərə müvafiq tərtib edilməsi;
- auditorların müstəqilliyinə dair Azərbaycan Respublikasının qanunvericiliyindən və peşə etikası məcəlləsindən irəli gələn tələblərin icra edilməsi.
5.3.  Müfəttiş keyfiyyətə nəzarət üzrə yoxlamanın gedişində, həmçinin, aşağıdakılar barədə nəticələr çıxarır:
- görülmüş işlərin auditor fəaliyyətinə uyğun olub-olmaması və bu fəaliyyətin davam etdirilməsi ehtimalı;
- auditor xidmətinin göstərilməsi üzrə müqavilə öhdəlikləri;
- yoxlamanın xüsusiyyətlərinin, vaxtının və seçmə üsulunun ümumi məcmusunun tərtib olunması üzrə işin planlaşdırılması;
- iş sənədlərinin mövcudluğu və müvafiqliyi;
- maliyyə hesabatlarının auditinin və maliyyə hesabatlarına dair auditor rəyinin əsaslandığı müvafiq iş sənədlərinin keyfiyyəti.
5.4. Yoxlama başa çatdıqdan sonra yoxlama üçün seçilmiş müqavilə öhdəliyi üzrə ayrı-ayrılıqda hər bir audit işi qiymətləndirilir. Qiymətləndirmə keyfiyyətə nəzarət üzrə hesabata daxil edilir.
5.5. Qiymətləndirmə zamanı  aşağıdakı qiymətləndirmə meyarlarından istifadə edilir:
a) qənaətbəxş – qiymətləndirmə «A» (bu qiymətləndirmədə aşkar olunmuş nöqsan və çatışmazlıqlar qeyri-əhəmiyyətli hesab edilir). Keyfiyyətə nəzarət üzrə hesabata yoxlama zamanı peşəkar fəaliyyətin müqavilə öhdəliyi üzrə ayrı-ayrılıqda hər bir audit işinin yaxşılaşdırılmasına yönələn tövsiyələr daxil edilir;
b) qismən qənaətbəxş -  qiymətləndirmə «B». Keyfiyyətə nəzarət üzrə hesabata yoxlama zamanı peşəkar fəaliyyətin müqavilə öhdəliyi üzrə ayrı-ayrılıqda hər bir audit işinin keyfiyyətinin yaxşılaşdırılmasına yönələn tövsiyələr daxil edilir (belə ki, bu qiymətləndirmədə aşkar olunmuş nöqsan və çatışmazlıqlar əhəmiyyətli hesab edilir);
c) qeyri-qənaətbəxş -  qiymətləndirmə «C». Keyfiyyətə nəzarət üzrə hesabatda müqavilə öhdəliyi üzrə ayrı-ayrılıqda yoxlanılan hər bir audit işi qiymətləndirilərkən peşəkar fəaliyyətin Azərbaycan Respublikasının qanunvericiliyinə, audit standartlarının tələblərinə və peşə etikası məcəlləsinə uyğun olmayan nöqsan və çatışmazlıqlar qeyd olunur. Auditorlar Palatasının Keyfiyyətə nəzarət komitəsinin hesabatı intizam tənbehinin tətbiq edilməsi məqsədilə Auditorlar Palatasının Etika Komitəsinin müzakirəsinə təqdim edilir.
5.6. Keyfiyyətə nəzarət komitəsinə keyfiyyətə nəzarət üzrə yoxlamanın yekunlarına dair hesabatda aşkar olunmuş nöqsan və çatışmazlıqların aradan qaldırılmasına dair iş planı, proqram və tövsiyələrin həyata keçirilməsi üçün müddət göstərilməklə, tərtib edilmiş cədvəl təqdim edilir.  Təqdim edilmiş iş planı keyfiyyətə nəzarət üzrə hesabata əlavə olunur və sonrakı yoxlama zamanı istifadəsi mümkün sayılır.

VI. Nəticələrin sənədləşdirilməsi və elan olunması

6.1. Keyfiyyətə nəzarət üzrə yoxlamanın yekunları, müqavilə öhdəliyi üzrə ayrı-ayrılıqda hər bir audit işinin qiymətləndirilməsi və müvafiq nəticələr keyfiyyətə nəzarət üzrə hesabatda cəmləşdirilir.
6.2. Fəaliyyəti yoxlanılmış auditorun iştirakı ilə keçirilən iclas zamanı nəzarət qrupunun rəhbəri keyfiyyətə nəzarət üzrə yoxlamanın yekunlarına və hesabatın layihəsində göstərilən nəticələrə dair izahat verir.
6.3. İclasdan 10 gün sonra nəzarət qrupunun rəhbəri yoxlamanın yekunlarına dair hesabatı Keyfiyyətə nəzarət komitəsinə təqdim edir. Hesabatın surəti, həmçinin, fəaliyyəti yoxlanılmış auditora təqdim edilir.
6.4. Yoxlama nəticəsində aşkar olunmuş nöqsan və çatışmazlıqların səbəbi əhəmiyyətli faktlara əsaslanmaqla açıqlanıb hesabata əlavə edilir.  
   
VII. Yoxlama başa çatdıqdan sonra auditor tərəfindən həyata keçirilən tədbirlər

7.1. Fəaliyyəti yoxlanılan auditor nəzarət qrupu tərəfindən aşkar olunmuş nöqsan və çatışmazlıqların aradan qaldırılması və peşəkar fəaliyyətinin yaxşılaşdırılmasına görə məsuliyyət daşıyır.
7.2. Keyfiyyətə nəzarət üzrə hesabatın təqdim olunması və ya Palata Şurasının müvafiq qərar qəbul etməsindən sonrakı 30 gün ərzində fəaliyyəti yoxlanılan auditor aşkar olunmuş nöqsan və çatışmazlıqların aradan qaldırılması məqsədilə iş planı və yoxlamanın nəticələri ilə əlaqədar peşəkar fəaliyyətinin yaxşılaşdırılması üçün məsul olan əməkdaşların siyahısını Keyfiyyətə nəzarət Komitəsinə təqdim edir.
7.3. Yoxlamanın nəticəsi üzrə qiymətləndirməyə dair sübutları 30 gün ərzində Palata Şurasına təqdim etmək olar.
7.4. Palata Şurası bu Əsasnamənin 7.3-cü bəndində nəzərdə tutulmuş qiymətləndirməyə dair sübutları 30 gün ərzində müzakirə edir və onların əsaslı olub-olmamasını müəyyənləşdirib, özünün qərarı barədə fəaliyyəti yoxlanılan auditoru məlumatlandırır.
7.5. Əsasnamənin 5.6-cı bəndində nəzərdə tutulan plan və proqramda xüsusi fəaliyyət növləri və peşəkar fəaliyyətin yaxşılaşdırılması ilə əlaqədar tədbirlərin yerinə yetirilməsinin müddətləri göstərilir. Bir qayda oaraq, auditor tərəfindən peşəkar fəaliyyətinin yaxşılaşdırılması 90 gün ərzində həyata keçirilir. İcra müddətinin son tarixinə qədər tədbirlər həyata keçirilməsə, iş planı və proqramın icrası Keyfiyyətə nəzarət komitəsi ilə əlaqələndirilməklə təmin edilir.