Oktyabrın 16-da Bakıda "Gülüstan" sarayında Azərbaycan Respublikası Milli Məclisinin İqtisadi siyasət komitəsi, Dövlət Neft Fondu, Maliyyə və Vergilər nazirlikləri, Hesablama Palatası, Azərbaycan İqtisadçılar İttifaqı və Auditorlar Palatasının birgə təşkilatçılığı ilə "Böhrandan sonrakı iqtisadiyyatda maliyyə resurslarının səmərəli idarə olunmasında şəffaflığın rolu" mövzusunda ikigünlük beynəlxalq elmi-praktiki konfrans başlanmışdır.
On beş ölkənin və bir sıra beynəlxalq qurumların nümayəndələrinin iştirak etdiyi tədbirdə şəffaflığın artırılması sahəsində mövcud problemlər
və onların həlli yolları istiqamətində müzakirələr aparılmışdır.
Konfrans başlanmazdan əvvəl onun iştirakçıları Fəxri xiyabana gələrək müasir Azərbaycan dövlətinin memarı və qurucusu, ümummilli lider Heydər Əliyevin xatirəsini ehtiramla yad etmiş, məzarı önünə əklil qoymuşlar.
Görkəmli oftalmoloq alim, akademik Zərifə xanım Əliyevanın da xatirəsi yad olunmuş, məzarı üstünə gül dəstələri düzülmüşdür.
Sonra konfrans iştirakçıları Şəhidlər xiyabanında Azərbaycanın müstəqilliyi və ərazi bütövlüyü uğrunda canlarından keçmiş qəhrəman Vətən övladlarının məzarları üzərinə qərənfillər düzmüş, "Əbədi məşəl" abidəsinin önünə əklil qoymuşlar.
Konfransı Azərbaycan Respublikası Milli Məclisinin İqtisadi siyasət komitəsinin və Azərbaycan İqtisadçılar İttifaqının sədri akademik Ziyad Səmədzadə açmışdır. O demişdir ki, hazırda Azərbaycan dünyanın ən dinamik inkişaf edən ölkələrindən biridir. Son illər ölkədə aparılan islahatlar, ulu öndər Heydər Əliyevin müəyyən etdiyi inkişaf strategiyasının reallaşması nəticəsində Azərbaycan regionda lider dövlətə çevrilmişdir. Artıq neçə illərdir ki, Azərbaycan özünün inkişaf səviyyəsinə, iqtisadi artım sürətinə görə MDB məkanında lider ölkədir.
Azərbaycan Respublikası Hesablama
Palatasının sədri Heydər Əsədov
Şəffaflıq və səmərəlilik dövlət
maliyyə nəzarətinin prioritet hədəfidir,
Azərbaycan Respublikası Dövlət Neft Fondunun
icraçı direktoru Şahmar Mövsümov Mədən
Hasilatında Şəffaflıq
Təşəbbüsünün (MHŞT) Azərbaycanda
tətbiqi, Azərbaycan Respublikası vergilər nazirinin
müavini Sahir Məmmədxanov Müasir
mərhələdə vergi nəzarəti: islahatlar və
perspektiv inkişaf istiqamətləri, Sahibkarlığa
və Bazar İqtisadiyyatının İnkişafına
Yardım Fondunun rəhbəri Sabit Bağırov Resursların
yaxşı idarə olunmasında vətəndaş
cəmiyyətinin rolu, Azərbaycan Respublikası Milli
Məclisinin Aqrar siyasət komitəsinin sədri Eldar
İbrahimov Aqrar sahədə maliyyə resurslarından
səmərəli və şəffaf istifadə
məsələləri, Milli Məclisin Aqrar siyasət
komitəsinin sədr müavini, Azərittifaqın idarə
heyətinin sədri Eldar Quliyev Ərzaq
təhlükəsizliyinin təmin edilməsi və
antiböhran maliyyə tədbirləri, Azərbaycan
Respublikasının Satınalmalar üzrə Dövlət
Agentliyinin direktoru İsgəndər Çəndərli
Dövlət satınalmaları sahəsində
şəffaflığın və ədalətli
rəqabət prinsiplərinin təmin olunması,
Azərbaycan Universitetinin rektoru, AMEA-nın müxbir üzvü
Akif Musayev Qlobal maliyyə böhranının aradan
qaldırılması cəhdləri və beynəlxalq
maliyyə nəzarətinin təkmilləşdirilməsi
mövzularında çıxış edərək,
maliyyə resurslarının səmərəli idarə
olunmasında şəffaflığın rolundan, bu sahədə
rəhbərlik etdikləri qurumların
fəaliyyətindən ətraflı
danışmışlar. Neft gəlirləri sayəsində
Azərbaycanda həyata keçirilmiş və hazırda
həyata keçirilən irimiqyaslı layihələr
barədə məlumatlar verilmiş, regionlarda
sahibkarlığın inkişafı sahəsində
görülən tədbirlər diqqətə
çatdırılmışdır.
Beynəlxalq Mineral Ehtiyatlarının
Hasilatı ilə Məşğul olan Sənaye
Sahələrində Şəffaflıq
Təşəbbüsü katibliyinin başçısı
Conas Moberq, Beynəlxalq İqtisadçılar
İttifaqının vitse-prezidenti - baş direktoru Viktor
Krasilnikov, Böyük Britaniyanın Sertifikatlı Mühasiblər
Assosiasiyasının (ACCA) Yaxın Şərq üzrə
nümayəndəsi Stefan Şilds, Türkiyənin Sakarya Universitetinin
professoru Aytac Eker, ACCA-in Ukrayna, Baltikyanı və Qafqaz
ölkələri üzrə rəhbəri Natalya Vovçuk,
Omanın Qrant Tornton şirkətinin icraçı direktoru,
ACCA-in region üzrə nümayəndəsi Nasir
Əl-Müqeyri, Latviyanın BDO Zelmenis & Liberty hüquq
şirkətinin partnyoru Yanis Zelmenis, Polşa
Mühasiblər Assosiasiyasının Baş audit
komitəsinin müdir müavini Tadueş Pyeniajek və Samara
Peşəkar Mühasiblər, Auditorlar, Maliyyə
Menecerləri və İqtisadçılar İnstitutunun
Prezident Şurasının üzvü Valentin Ryabov maliyyə
sahəsində şəffaflıqla bağlı öz
ölkələrinin, təşkilatlarının
təcrübəsindən bəhs etmiş, bu işdə
qabaqcıl beynəlxalq təcrübənin
öyrənilməsinin vacibliyini diqqətə
çatdırmışlar.
Azərbaycan Respublikasının Prezidenti,
zati-aliləri cənab İlham Əliyevə konfrans
iştirakçıları adından müraciət qəbul
edilmişdir. Müraciətin mətnini Azərbaycan
Respublikası Auditorlar Palatasının Elmi-tədqiqat və
tədris mərkəzinin direktoru Səbuhi
Gülməmmədov oxumuşdur.
***
Böhrandan sonrakı iqtisadiyyatda maliyyə resurslarının
səmərəli idarə olunmasında
şəffaflığın rolu elmi-praktik konfransının
iştirakçıları oktyabrın 17-də Heydər
Əliyev Fondunda olmuşlar.
Qonaqlara ulu öndərin xatirəsinə ehtiram
əlaməti olaraq yaradılmış Fondun tarixi,
məqsədləri barədə məlumat verilmişdir.
Ümummilli liderin şəxsi arxivindən
götürülmüş və onun fəaliyyətinin
ayrı-ayrı dövrlərini əhatə edən
eksponatlara, fenomen şəxsiyyət Heydər Əliyevin
həyatının ən müxtəlif məqamlarını
əks etdirən və tariximizin bütöv bir dövrü
barədə geniş təsəvvür yaradan
sənədlərə diqqətlə nəzər yetirən
konfrans iştirakçıları görkəmli siyasi xadimin
Moskvada keçmiş SSRİ-nin rəhbərlərindən
biri olarkən genişmiqyaslı fəaliyyətini əks
etdirən fotolara, ötən əsrin nəhəng
tikintilərindən olan Baykal-Amur dəmir yolu magistralının
(BAM) çəkilişinə uğurla rəhbərlik
etdiyinə görə ona verilmiş xatirə medalına,
BAM-ın 1 nömrəli sərnişini vəsiqəsinə,
Bakı-Tbilisi-Ceyhan əsas ixrac boru kəmərinin
keçdiyi ərazilərin maketinə baxmışlar.
Məlumat verilmişdir ki, ulu öndərin xatirəsinə
İstanbul, Ankara, Ceyhan, İğdır, Qars, habelə
Buxarest, Daşkənd, Kiyev və Tbilisidə abidələr
ucaldılmışdır.
Tanışlıqdan sonra qonaqlar Fondun xatirə
kitabına ürək sözlərini yazmışlar. Burada
gördüklərindən məmnun olduqlarını
söyləyən konfrans iştirakçıları
Heydər Əliyevin zəkasına və intellektinə heyran
qaldıqlarını bildirmişlər.
***
"Böhrandan sonrakı iqtisadiyyatda
maliyyə resurslarının səmərəli idarə
olunmasında şəffaflığın rolu"
mövzusunda beynəlxalq elmi-praktiki konfrans işini oktyabrın
17-də bölmə iclaslarında davam etdirmişdir.
Auditorlar Palatasında keçirilən
"Böhrandan sonrakı iqtisadiyyat və maliyyə
resurslarının səmərəli idarə olunması:
problemlər və vəzifələr" mövzusunda iclasa
iqtisad elmləri doktorları, professorlar Tərbiz Əliyev
və Bəyalı Ataşov, "Qlobal maliyyə
böhranının aradan qaldırılmasında və
böhrandan sonrakı iqtisadiyyatda maliyyə nəzarətinin
təkmilləşdirilməsi zərurəti" mövzusunda
iclasa isə iqtisad elmləri doktoru, professor Sifariz
Səbzəliyev və iqtisad elmləri namizədi Yaşar
Kəlbiyev sədrlik etmişlər.
İclaslarda "Maliyyə ehtiyatlarının
tənzimlənməsində şəffaflıq amilinin
bəzi istiqamətləri", "Bank
şəffaflığı maliyyə axınlarının
artım amili kimi", "Sahibkarlığın
səmərəliliyinin yüksəldilməsi probleminə
yeni yanaşmalar", "Maliyyə böhranı və
Azərbaycan iqtisadiyyatı", "Qlobal maliyyə
böhranının büdcə və büdcə
siyasətinə təsiri", "Maliyyə resurslarından
məqsədli istifadənin şəffaflığının
təmin edilməsində müəssisənin daxili audit
xidmətinin rolu", "Bələdiyyələrdə
şəffaflığın artırılmasında auditin
rolu" və digər aktual mövzularda məruzələr
dinlənilmişdir.
Sonda bölmə sədrlərinin hesabatları
dinlənilmiş və müzakirələrdən sonra
iclaslara yekun vurulmuşdur.
Beynəlxalq elmi-praktiki konfransın
tövsiyələri qəbul edilmişdir.
Bununla da on beş ölkənin və bir
sıra beynəlxalq təşkilatların
nümayəndələrinin iştirakı ilə
keçirilən elmi-praktiki konfrans başa
çatmışdır.
