"AZƏRBAYCAN RESPUBLİKASININ AUDİTORLAR PALATASI"

Bakı şəhəri N 1/32 24 dekabr 2009-cu il

Sığortaçılarda müstəqil auditin aparılmasına dair
minimum tələblər haqqında

"Sığorta fəaliyyəti haqqında" Azərbaycan Respublikasının Qanununa əsasən Beynəlxalq Sığorta Nəzarətçiləri Asossiasiyasının prinsipləri və standartlarına uyğun olaraq sığortaçılarda müstəqil auditin aparılmasına dair minimum tələblərin müəyyən edilməsini nəzərə alaraq qərara alıram:

1. Təsərrüfat subyektlərində - sığortaçılarda aparılan audit zamanı Azərbaycan Respublikası Maliyyə Nazirliyi tərəfindən 2008-ci il 14 noyabr tarixli 1-110 saylı əmri ilə təsdiq edilmiş və Azərbaycan Respublikası Ədliyyə Nazirliyində 2008-ci il 27 noyabr tarixli 3417 saylı şəhadətnamə ilə dövlət qeydiyyatına alınmış "Sığortaçılarda müstəqil auditin aparılmasına dair minimum tələblər"ə əməl edilməsi sərbəst auditorlara və auditor təşkilatlarının rəhbərlərinə tapşırılsın.

2. Auditin keyfiyyətinə nəzarət şöbəsinə (Y.Namazəliyev) tapşırılsın ki, sərbəst auditorların və auditor təşkilatlarının fəaliyyətləri yoxlanılarkən "Sığortaçılarda müstəqil auditin aparılmasına dair minimum tələblər"ə riayət edilməsi vəziyyəti araşdırılsın və nəticəsindən asılı olaraq müvafiq təkliflər verilsin.

3. Bu sərəncam və Azərbaycan Respublikası Maliyyə Nazirliyi tərəfindən 2008-ci il 14 noyabr tarixli 1-110 saylı əmri ilə təsdiq edilmiş və Azərbaycan Respublikası Ədliyyə Nazirliyində 2008-ci il 27 noyabr tarixli 3417 saylı şəhadətnamə ilə dövlət qeydiyyatına alınmış "Sığortaçılarda müstəqil auditin aparılmasına dair minimum tələblər" Auditorlar Palatasının internet saytında yerləşdirilsin və Palatanın "İqtisadiyyat və audit" jurnalında dərc edilsin.

PALATANIN SƏDRİ V.Novruzov

Azərbaycan Respublikasının Ədliyyə Nazirliyində

27 noyabr 2008-ci il tarixli 3417 şəhadətnamə N-si ilə dövlət qeydiyyatına alınmışdır.
Azərbaycan Respublikasının Maliyyə Nazirliyinin

14 noyabr 2008-ci il tarixli
İ-110 N-li əmri ilə təsdiq edilmişdir.

Sığortaçılarda müstəqil auditin aparılmasına dair minimum tələblər

1. Ümumi müddəalar

1.1. Bu tələblər Azərbaycan Respublikasının "Sığorta fəaliyyəti haqqında"
Qanununun 77.5-ci maddəsinə əsasən, həmin Qanuna və Azərbaycan
Respublikasının digər qanunvericilik aktlarına, habelə Beynəlxalq Sığorta
Nəzarətçiləri Assosiasiyasının prinsip və standartlarına uyğun olaraq hazırlanmış və sığortaçılarda müstəqil auditin aparılmasına dair beynəlxalq sığorta nəzarəti əcrübəsinə uyğun olaraq minimum tələbləri muəyyən edir.
1.2. Bu tələblərdə istifadə olunan "sığortaçı" anlayışı sığortaçılarla yanaşı,
"Sığorta fəaliyyəti haqqında" Azərbaycan Respublikası Qanununun 1.2-ci maddəsinə uyğun olaraq, təkrarsığortaçıları da əhatə edir.
1.3. Sığortaçının müstəqil auditinin aparılmasına dair minimum tələblər sığortaçıda müstəqil auditin əhatə etməli olduğu məsələlərin bu tələblərdə nəzərdə tutulmuş siyahısı, müstəqil auditin bu məsələləri tam və düzgün araşdırması və araşdırma nəticələrinə uyğun olaraq, əhatəli və obyektiv rəy verməsi ilə şərtlənir.
1.4. Sığortaçının müstəqil auditoru maliyyə hesabatlarında məlumatların yanlış göstərilməsi və düzgün əks etdirilməməsi hallarının aşkar olunmamasına görə məsuliyyət daşıyır.
2. Müstəqil auditin əhatə etdiyi məsələlər
2.1. Sığortaçıda aparılan müstəqil audit aşağıdakı məsələləri əhatə etməlidir:
2.1.1. sığortaçının təsis sənədlərinin, qeydiyyatı haqqında şəhadətnaməsinin, sığorta və ya müstəsna olaraq təkrarsığorta fəaliyyəti ilə məşğul olmaq hüququ verən lisenziyanın mövcudluğu və qanunvericiliyə uyğunluğu;
2.1.2. sığortaçının həyata keçirilən fəaliyyətinin qanunvericiliyin tələblərinə uyğunluğu;
2.1.3. sığortaçının maliyyə sabitliyi və ödəmə qabiliyyəti normativlərinin muəyyən edilməsinin düzgünlüyü, o cümlədən tələb olunan kapitalın və məcmu kapitalının hesablanmasının və məbləğinin qanunvericiliyin tələblərinə uyğunluğu;
2.1.4. sığortaçının uçot siyasətinin və mühasibat uçotunun aparılmasının, habelə aktivlərinin, öhdəliklərinin və kapitalının qiymətləndirilməsinin metod və vasitələrinin, qanunvericiliyə və müvafiq hallarda beynəlxalq mühasibat uçout standartlarına uyğunluğu;
2.1.5. sığortaçılar ücün nümunəvi hesablar planının tətbiqinin düzgünlüyü;
2.1.6. sığorta müqavilələri ilə bağlı müvafiq göstəricilərin maliyyə hesabatlarında tam və düzgün əks etdirilməsi;
2.1.7. təkrarsığorta əməliyyatlarının həyata keçirilməsinin düzgünlüyü;
2.1.8. sığorta, o cümlədən təkrarsığorta və şərikli sığorta əməliyyatlarının uçotunun aparılmasının düzgünlüyü;
2.1.9. sığorta və ya təkrarsığorta müqavilələri üzrə sığortaçının şəxsi tutumunun yuxarı həddinə dair tələblərə əməl edilməsi;
2.1.10. sığortaçının sığorta ehtiyatlarının hesablanmasının və mühasibat uçotunda əks etdirilməsinin düzgünlüyü, o cümlədən sığorta ehtiyatlarının və öz vəsaitinin təmin edilməsi üçün qəbul edilən aktivlərə qoyulan investisiyaların qanunvericiliyin tələblərinə uyğunluğu;
2.1.11. sığortaçının mühasibat balansının bütün hesablarının inventarizasiyası, o cümlədən ilkin mühasibat sənədlərinin mövcudluğu, həyata keçirilmiş maliyyə və təsərrüfat əməliyyatlarının uçotda və hesabatda vaxtında, tam və dəqiq əks etdirilməsi, əməliyyatların təsdiq olunmuş uçot siyasəti, o cümlədən sığortaçının daxili sənədlərinə müvafiq qaydada hesab üzrə həyata keçirilməsi;
2.1.12. sığortaçının gəlir və xərclərinin tam və düzgün əks olunması;
2.1.13. mümkün tələblər və öhdəliklər, həmçinin balansdankənar hesablar üzrə uçotun aparılmasının düzgünlüyü;
2.1.14. vergi ödənişlərinin tam və düzgün hesablanması.